सिन्धुली/२० असार/पछिल्लो समय सिन्धुली जिल्लामा सहकारी संस्थाहरुको संख्या ह्वातै बढेको छ । डिभिजन सहकारी कार्यालय धनुषाको तथ्याङक अनुसार जिल्लामा सहकारी संस्थाहरुको संख्या झण्डै पाँचसय अर्थात ४ सय ९४ पुगेको छ ।

डिभिजन कार्यालयको तथ्याङक अनुसार जिल्लामा सबैभन्दा बढी कृषि सहकारी संस्थाहरु संचालनमा रहेका छन । जिल्लामा १७८ वटा कृषि सहकारी, १४० वटा बचत तथा ऋण सहकारी, ३३ वटा बहुउदेश्यीय सहकारी, ३१ वटा जुनार उत्पादक सहकारी, १९ वटा उपभोक्ता सहकारी, १९ वटा दुग्ध उत्पादक सहकारी, १८ वटा जडिबुटी सहकारी, १० वटा लघु उद्यम सहकारी, ८ वटा तरकारी तथा फलफुल सहकारी, ७ वटा विद्युत सहकारी, ६ वटा मौरीपालन सहकारी, ५ वटा पशुपालन सहकारी, ४ वटा स्वास्थ्य सहकारी, ३ वटा सञ्चार सहकारी, २ वटा पर्यटन सहकारी साथै खानेपानी, पशुपक्षि, बन र मत्स्यपालन सहकारी एक–एक वटा साथै जिल्ला सहकारी संघ र ६ वटा विषयगत संघ सहित जम्मा सहकारीको संख्या ४ सय ९४ पुगेको हो ।
त्यस्तै कार्यालयको रेकर्ड अनुसार जिल्लाका विभिनन् विद्याका सहकारीहरुमा कुल ५२ हजार ४२५ जना शेयर सदस्यहरु आबद्ध रहेको देखिएको छ । सहकारीमा कुल १३,७९,६०,६६३ शेयर रकम साथै ५८,४४,७२,१२१ बचत र ५०,५०,६३,८५० ऋण लगानी रहेको डिभिजन सहकारी कार्यालय जनकपुरले जनाएको छ ।
जिल्लामा यति धेरै संख्यामा सहकारी संस्थाहरु दर्ता भएपनि सहकारी सञ्चालन सम्बन्धी चेतनाको कमीले सहकारी क्षेत्रमा केहि समस्याहरु समेत देखा पर्ने गरेका छन । सहकारी दर्ता गर्ने तर त्यसलाई संस्थागत भन्दा पनि व्यक्तिगत ढंगले सञ्चालन गर्ने प्रवृत्तिहरु बढ्दै गएकाले पनि सहकारी क्षेत्रमा समस्या देखिएको स्थानीयहरु बताउछन ।
सहकारीको निती, नियम र मुल्य मान्यताहरुको बारेमा सवै शेयर सदस्यहरुलाई सचेत गराउन सकेमा र झोलामा मात्र रहेका सहकारीहरुलाई पनि व्यवस्थित ढंगले सञ्चालन गर्न सकेमा सहकारीहरुले जिल्लालाई माथि उठाउन महत्वपूर्ण भुमीका निर्वाह गर्न सक्ने देखिन्छ ।