४ साउन, काठमाडौं । नेकपा एमालेले बरिष्ठ नेता माधवकुमार नेपालमाथि रौतहटको गौरमा मधेस केन्द्रित केही दलका व्यक्तिले आक्रमण गरेको भन्दै आक्रमणकारीमाथि कारवाहीको माग गरेको छ । एमालेले अर्थमन्त्री डा. रामशरण महतमाथिको आक्रमणको पनि भर्त्सना गरेको छ ।
सुझाव रोक्न खोज्नेहरु लोकतन्त्र विरोधी

एमाले केन्द्रीय सचिवालयका सचिव प्रदीप ज्ञवालीले सोमवार विज्ञप्ति जारी गरी संविधानमा जनताको सुझाव रोक्न खोज्नेहरु लोकतन्त्र विरोधी भन्दै उनीहरु विरुद्ध एकजुट हुन जनतालाई आह्वान समेत गरेका छन् ।
गौरमा केही मधेसकेन्द्रित दलका कार्यकर्ताको आक्रमणमा एमालेका कार्यकर्ता घाइते भएको विज्ञप्तिमा उल्लेख छ । आक्रमणमा शिवशङ्कर यादव, मनोज सिंह, बैजनाथ सहनी, विनोद पटेल, पारस हुसैन, निरज सिंह र किशोर पटेल लगायत व्यक्तिहरू घाइते भएका छन् ।
बिचलित नहुन आग्रह
एमालेले भनेको छ, ‘यस्ता अराजक तत्वहरूबाट जनताको रायसुझाव सङ्कलन कार्य अवरुद्ध हुन नदिन तथा सुरक्षा व्यवस्था प्रभावकारी बनाउन सरकारको गम्भीर ध्यानाकर्षण गर्दछ । कुनै पनि होहल्ला, उत्तेजना र गैरजिम्मेवार अभिव्यक्तिहरूबाट प्रभावित र विचलित नभइ उच्च मनोबल र संयमताकासाथ सक्रियतापूर्वक आफ्ना रायसुझाव प्रस्तुत गर्न र ‘हाम्रो संविधान, राम्रो संविधान’ बनाउने ऐतिहासिक अभियानमा व्यापकरूपमा सहभागी हुन आम जनसमुदायमा हार्दिक आह्वान गर्दछ ।’